A mundemi ne ta ndjejmë dhimbjen e të tjerëve? Si lidhet dhe shpërndahet ajo përmes historive, realiteteve të gjinorizuara dhe politikës shoqërore? Si formësohet sëmundja prej kontekstit dhe ç’lloj botë-jetësh ngrihen prej saj? Këto pyetje i kam hulumtuar mes grave në Kosovë duke zbuluar një gjuhë unike simptomatike, me anë të së cilës ato komunikojnë dhimbjen dhe vuajtjet e tyre mbi Luftën e Kosovës dhe vështirësitë e pasluftës.

Këtë gjuhë e quaj Symptomspeak – Simptomaflet.

Simptoma(ë): dukuri trupore, mendore dhe shoqërore, rrethana apo kushte që krijohen, rrjedhin, apo shoqërojnë sëmundje e ndjenja, si dhe problemet shoqërore e politike.

Speak – flet: flas – veprim verbal, përshfaqës dhe i integruar i dhënies së informacionit, pikëpamjeve e ndjenjave në ndërveprim me të tjerët.